Responsive image
English site
English site

දිනය: 09-01-2019 | වේලාව: ප.ව 02:58 | 24

ශ්‍රී ලංකා-සිංගප්පූරු වෙළඳ ගිවිසුම එරෙහි පෙත්සම කල් යයි

ශ්‍රී ලංකා - සිංගප්පූරු නිදහස් වෙළඳ ගිවිසුම ආණ්ඩුක්‍රම ව්‍යවස්ථාවට පටහැනි බවට ප්‍රකාශ කරන මෙන් ඉල්ලා ගොනු කර ඇති පෙත්සම් මැයි මස 22 වනදා යළි කැඳවන ලෙස ශ්‍රේෂ්ඨාධිකරණය නියම කර තිබේ.

රජයේ වෛද්‍ය නිලධාරීන්ගේ සංගමය ඇතුළු පාර්ශව කිහිපයක් විසින් අදාළ පෙත්සම් ඉදිරිපත් කර තිබුණි.

 පෙත්සම් අද (09)  බුවනෙක අළුවිහාරේ, ප්‍රියන්ත ජයවර්ධන සහ එල්.ටී.බී.දෙහිදෙණිය යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැඳවනු ලැබුවේය.

එහිදී පෙත්සම්කාර පාර්ශවයේ නීතිඥවරු අධිකරණයට දැනුම් දී ඇත්තේ ශ්‍රී ලංකා - සිංගප්පූරු වෙළඳ ගිවිසුම පිළිබඳව අධ්‍යයනය කර නිර්දේශ ඉදිරිපත් කිරීම සඳහා ජනාධිපතිවරයා විසින් කමිටුවක් පත්කර ඇති අතර එම කමිටුව මගින් ඊට අදාළ වාර්තාව ජනාධිපතිවරයා වෙත මේ වන විට ඉදිරිපත් කර ඇති බවයි.

කමිටු වාර්තාව මගින් කර ඇති නිර්දේශ පිළිබඳව ජනාධිපතිවරයා ගන්නා ක්‍රියාමාර්ගය දෙස තමන් බලා සිටින බව සඳහන් කළ පෙත්සම්කාර පාර්ශවයේ නීතිඥවරුන් අනතුරුව පෙත්සම සලකා බැලීම සම්බන්ධයෙන් තීරණයක් ගන්නා බවද අධිකරණයට දැනුම් දී තිබේ.

 ඒ අනුව පෙත්සම මැයි මස 22 වනදා කැඳවීමට නියම කළ ශ්‍රේෂ්ඨාධිකරණය එදින පෙත්සම සලකා බැලීම  පිළිබඳව අධිකරණය දැනුවත් කරනමෙන් පෙත්සම්කාර පාර්ශවය නියම කළේය.

පෙත්සම්කරුවන් කියා සිටින්නේ ශ්‍රී ලංකා සිංගප්පූරු නිදහස් වෙළෙඳ ගිවිසුම අත්සන් කොට ඇත්තේ පාර්ලිමේන්තුවේ අනුමැතියකින් තොරව බවයි.

 එබැවින් ඒ තුළින් ආණ්ඩුක්‍රම ව්‍යවස්ථාව උල්ලංඝනය වීමක් සිදු වන බව පෙන්වාදෙන පෙත්සම්කරුවන් එම ගිවිසුම බල රහිත කිරීමේ ආඥාවක් නිකුත් කරන මෙන්ද ශ්‍රේෂ්ඨාධිකරණයෙන් ඉල්ලා තිබේ.

මේ අතර සිංගප්පූරු වෙළෙඳ ගිවිසුම සම්බන්ධයෙන් සාකච්ඡා කිරිමට අවස්ථාවක් ලබාදෙන ලෙස  ඉල්ලා අද දිනයේ දී ජනාධිපතිවරයා වෙත ලිපියක් යොමු කිරීමට බලාපොරොත්තු වන බව රජයේ වෛද්‍ය නිලධාරින්ගේ සංගමය පවසයි.

මූලාශ්‍ර